Goodnotes V.S OneNote 比較：熱門筆記 Apps 全方位評比 #2

疫情肆虐，學生成日都要係屋企用電子產品上堂，而搵到啱自己嘅筆記 Apps可以提高學習效率，令你讀書事半功倍！上次小編選擇左Goodnotes、 Notability 兩款熱門筆記 Apps同大家做筆記 Apps 嘅評比，大家反應都唔錯，所以小編決定再幫大家分析唔同筆記 Apps 嘅優點同缺點 ! 今次就係Goodnotes、OneNote嘅大評比。希望幫到你搵到適合嘅筆記Apps，製作屬於自己嘅精讀筆記。

Goodnotes 、 OneNote 基本資料

	Goodnotes	OneNote
分類	筆記	筆記
價錢	HKD 78	免費
Size	308.6MB	464.9MB
供應商	Time Base Technology Limited （香港）	Microsoft Corporation（美國）
支援系統	iPadOS, iOS, macOS	iPadOS, iOS, macOS, Android

價錢方面，OneNote的確係學生既恩物（值得留意嘅係，iPadOS, iOS, macOS同埋 Android 版嘅OneNote都係免費嘅，不過 Android最多只可以建立五百個筆記，如果想升級為完整版，享受無限制嘅使用，就需要以$40係應用程式購買），不過功能上Goodnotes都唔輸差架。想知邊個app比較適合你？以下小編就幫大家從唔同方面比較左兩個apps，大家可以根據自己嘅需要選擇！

Round 1 : Goodnotes 、 OneNote 比較頁面設計

1.1 頁面樣式

Goodnote似現實中的筆記簿，大家可以自由設計或者下載其他相做封面。而模版都非常豐富，包括 A3至A7嘅紙、書信等唔同大細，仲有三種紙張顔色揀。

而Onenote 似活頁簿，有樹狀筆記嘅分類同層次，唔同分會有唔同顏嘅標籤顯示，而各分區都可以有自訂數量嘅頁面，好清楚就搵到想溫嘅課題。

1.2 頁面管理

Goodnotes嘅頁面大小有限制，係固定嘅，冇位就需要添加另一頁。不過添加下一頁嘅操作非常簡單，唔需要擔心。

而 Onenotes 係可以將頁面無限延伸嘅，無論你果課書有幾長，都一定唔會唔夠位。

Round 2 : Goodnotes 、 OneNote 比較筆類功能

小提示1 : Goodnotes 內嘅圓珠筆嘅粗幼係冇變化嘅，所以如果係上堂抄notes嘅話，最好選擇圓珠筆，就可以避免筆跡唔清楚啦～而鋼筆同畫筆都會根據壓感有粗幼嘅變化，要好迅速而字體又要清晰咁抄notes就未必岩用，但讀Art 或者 Bio 嘅同學有需要畫圖就好適合啦！而 OneNote只有一款筆，係會根據壓感有粗幼變化嘅，寫字果時就要特別留意啦～

小提示2：OneNote 會因為你使用暗色模式嘅頁面模版而自動幫你深色嘅字跡顏色適調，而 Goodnotes就會保持原色。

Round 3 : Goodnotes 、 OneNote 比較整體功能

3.1 可添加嘅非文本元素種類

	Goodnotes	OneNote
圖片	✔	✔
表情	✘	✔
公式	✘	✔
錄音	✘	✔
GIF	✘	✘
幾何圖形	✔	✔
網絡鏈接	✘	✔
置入PDF	✔	✔

Goonotes 同 OneNote都可以添加圖片同埋幾何圖形，兩個 apps都係只會支援常見既幾何圖形 （包括圓形、直線同埋多邊形）。另外，兩個 apps亦都可以置入 PDF，但只有 Goodnotes可以導入 PDF等單個文件。

3.2 比較文字搜索功能

Goodnotes 嘅文字搜索功能非常強大，可以輕易搜尋電腦字體，更加可以辨認手寫嘅字體，辯識度同準確度仲好高添！啱曬極多筆記，想迅速搵到特定 Topic溫習嘅你。

而 OneNote嘅文字搜索功能就相對比較弱，唔能夠模糊搜尋，中文嘅搜尋結果有時會有啲遣漏，但仍然能夠快速搜尋電腦字體，都好方便。

3.3 比較特色功能

Goodnotes 同 OneNote都有獨有嘅特色功能。Goodnotes有內置嘅放大器，方便瀏覽。另外，Goodnotes 亦有內置嘅激光筆，大家做project presentation嘅時候可以使用。

至於OneNote, 大家可以search到 PDF同埋圖片裏面嘅文字，方便以關鍵字搜尋內容。同時，大家可以係 OneNote 嘅 「研究工具」添加額外嘅功能。

Round 4 : Goodnotes 、 OneNote 比較筆記整理

4.1 導出選項

	Goodnotes	OneNote
PDF	✔	✔
圖像	✔	✘
以鏈結共享	✔	✔

兩款 apps都可以導出為方便閲讀及使用嘅 PDF，而 Goodnotes更有屏幕共享嘅功能，方便討論同埋匯報。

4.2 備份功能

	Goodnotes	OneNote
Dropbox	✔	✘
Google Drive	✔	✘
OneDrive	✔	✔
Box	✘	✘
PDF	✔	✘

值得留意嘅係，OneNote 有自動儲存嘅功能，會自動儲存係你帳號裏面，唔洗怕好俾心機整嘅筆記因為離線或者 hang 機而消失左。

總結

今次評比嘅兩個apps各有優點，最緊要根據自己嘅習慣同埋需要去揀～小編個人認為如果你係「手寫黨」，習慣左手寫，又或者想善用你支Apple pencil，發揮你嘅創意，設計富有個人風格嘅筆記，Goodnotes嘅功能同支援會比較適合你，令你每次整筆記都有完美嘅手寫體驗；而對於「打字黨」，好少需要為筆記配上插圖，又或者係比較懶惰嘅你，就可以善用OneNote嘅錄音、插入圖片等「懶人必用」嘅功能，製作簡潔嘅筆記。

筆記 Apps唔單只可以好整齊咁將筆記分類，更加方便共享或者分享俾朋友/師弟師妹～（如果你有又有用又靚嘅notes，不妨考慮下登記成為flowsophic 筆記共享平台嘅一分子，幫助其他學生！）

【延伸閱讀】最新熱門筆記 Apps 全方位評比：Goodnotes、Notability

【延伸閱讀】【Windows機好多款，唔知點揀？】買Windows機注意8大事項

【延伸閱讀】【咁多款iPad要點揀？】學生買iPad前必讀攻略