［#flowsophic考試準備］後日就考DSE中文卷一閱讀啦～係呢個最後既衝刺階段，如果大家想要啲雞精筆記或者更多操練，歡迎到下面link/呢度選購DSE 中文5**作文範文集，作文例子集同閱讀範文mock 或係呢到搵 DSE/CE/AL pastpaper !
有啲題目配合相關答題技巧，就可以攞到唔少幾分數，以下舉出一啲白話基本嘅題型 :
1. 三式判斷題
點樣叫正確、錯誤同埋無從判斷呢？例如2019年考評會議就曾經明確講明「以x說明y」的題目只可能得正確、錯誤，大家要銘記於心，咁到時就唔會好徬徨，覺得唔知揀正確定無從判斷。
2. 表格題/比喻題
你要留意下佢畀你例子個格式係點樣，例如2019年「開一個窗」 好明顯係動詞加名詞嘅組合，所以當你答答案嘅時候就應該有齊名詞同動詞 ，如追求+民主社會；推翻+政權。進階嘅題目，例如2016年嗰種咁，你就要留意返條題目嘅處境同埋特點，仲要睇下有冇唔覺眼嘅字眼，可能暗藏玄機，例如心還紅著的番薯，點解唔直接寫紅心蕃薯，要寫心還紅著的番薯呢？因為個答案係想你寫到「經歷人生歷練”仍”心繫家鄉的人」。 3. 結構用意題 : 通常問得你一句喺段落最尾或者特登開一段略寫嘅嘢，通常都有承上啟下嘅作用。咁你答嘅時候就要答齊佢點樣承接上文同埋開啟下文。
4. 表達手法題
第一種通常問你文章點樣「突出」B嘅形象，咁你就要醒水，因為呢啲就係問「襯托」，如果你嗰一刻唔知道正襯定反襯，你直接答襯托就會完整得分。有時候發現同學仔唔識得分襯托同對比，其實除咗題目本身你可以估到佢想你答咩之外，你仲可以諗下究竟佢有冇主次之分（襯托），定係佢其實兩人嘅係平等嘅（對比），佢純粹想比較下兩樣嘢，冇有意突出其中一方（對比）。留意篇文嘅核心係講咩，係講曬兩樣定係講其中一樣，例如篇文主要係講紅心蕃薯，咁其他嘢都係陪襯。另外，大家一定要掌握其他修辭手法（例如反諷、排比、比喻）嘅作用，唔單止白話篇章會考核，指定篇章都會考，記得要背番相關嘅作用同埋例子。
5. 標點符號題
大家一定要掌握唔同嘅標點符號嘅作用係咩，小至逗號有語氣停頓之意，大至破折號有引申語意、補充上文之意。
6. 其他題型，例如段落大意、主旨、比較題
呢啲片言隻語講唔清楚，亦比較複雜，非純粹背書同技巧可以解決，好講求理解同表達。不過，最後一問雖然都好講理解，但其實基本解釋同用文本依據都可能會拎到一至兩分。 所以大家千祈唔好放棄份卷同埋見到有少少深/係長答就唔做，其實未必係你想像中咁複雜，就算係2014年嘅《第九味》、2018年嘅《孤獨的理由》都唔係真係咁難。
近年文言文嘅出題趨勢都係出得比較簡短，相信有一般理解能力嘅考生都能夠處理到呢部分，個分高下嘅位就係你闡釋嘅詳細度同埋你中唔中point，例如上年咁，雖然《海鷗》個故事有好多寓意，但係最核心嘅寓意係咩？ 佢講到明你答到愛憎相對就算解釋唔詳細，都有可能去到3分。但係如果答居安思危，就只得1分（因為我答咗居安思危，所以好記得）不過，呢啲盡力啦，畢竟文言文都有選擇題、三式判斷、表格題，係可以拎到ok嘅分數。現階段如果同學已經操過past paper，我諗都唔使話放太多心力喺文言文呢度，識得基本字詞就ok，因為佢都唔似會出得好深。
至於範文同文言文嘅比較，具體技巧就唔詳細講，我覺得呢啲真係盡力處理，拎到少少分數就可以，唔值得去鑽研所謂「拎滿分」嘅技巧，因為其實你要拎五以上，絕對係唔需要好高分。
到最後嘅範文部分，同學好關心嘅，往往就係到底會出咩？ 當然啦，我哋唔係考評局，唔能夠完全估到佢出咩，但係最基本2018年同2019年出過嘅可以略溫（但唔係完全唔溫，要掌握基本大意、一啲基本字詞同埋修辭手法，佢就算唔出長答，都可以出語譯！）。2018 Sample paper 出咗都要照溫，因為嗰份嘢嚴格唔算出咗，佢隨時可以今年照出，同埋其實嗰份出嗰幾個課唔係難溫嘅課題，你更加冇藉口唔溫。
