1.入學須知
根據2021年公佈嘅入學分數，HKU精算係聯招加分機制下拎到51分經已穩入。值得一提嘅係，呢科有個特別requirement，就係要求學生中學一定要有讀M1/M2。面試嘅形式係小組面試，會有2個interviewer。問嘅問題主要都係同保險、經濟、AI有關，成組進行小組討論，有意見就舉手之後發表。Interview問題話難唔難，只要本身對呢方面有少許認識，基本上都能夠輕鬆應付。呢科唔係好着重interview，只要interview表現正常，DSE成績夠分基本上都一定收。
【贏在起跑線：按此查閱Flowsophic M1/2 筆記商店】
2.科目與學業
首先，有一樣非常重要嘅嘢一定要講。呢科話就話係讀4年，實際就係4年半，因為實情係Year 3 Sem1 要接近強制性返intern，而除此之外仲有8個sem係喺HKU裏面上堂。大家必須要注意呢點，唔好比Admission Leaflet呃到。Year 1 Sem1 有1個math course，econ course，accounting course，加埋language requirement & 大學通識。個人認為讀得幾輕鬆，只要上堂有留心，考試前幾日先開始溫都唔會考得差。
Year 1 sem2 開始會多math course同 stat course，讀嘅嘢會越嚟越接近精算師會接觸嘅東西。呢個Sem 比 Sem1 chur唔少，但只要俾心機，通常都會有B或以上。Intern 通常係Year 2 Sem2 完咗之後嘅下半年 (7月-12月)，朝九晚五有時要OT，每個月人工大概$10k。喺Year 1 Sem2 同 Year2，學校都會安排Career fair，令同學熟習in intern要注意嘅嘢。正路來講，只要唔好太低GPA，Intern都算容易搵到。
3.未來出路
呢幾年精算一直被指飽和，的而且確而家係越嚟越難揾到Permanent位，但畢業後要搵到工都尚算容易 (fresh grad ~20k)。未來幾年呢科可能會由半神科打落普通科，如果同學唔係真係對呢行有興趣，揀之前就真係要三思啦。
4.個人體會
HKU學生來自好多唔同地方，大陸人、日本人、韓國人、歐洲甚至中東學生都好容易喺campus裏面搵到。呢種感覺對我來講係似真係讀大學，唔同背景嘅人一齊學術交流，互相討論交流知識，而唔係好似中學咁樣日夜自己讀書，只係顧住成績。大學中印象比較深刻既活動應該係Annual dinner。嗰晚精算唔同year嘅學生都一齊食晚飯，著住綠袍食西餐，感覺幾高級。Annual dinner 更會邀請校外嘉賓，加埋校內唔少Professor都出席晚宴，係HKU精算一年一度嘅盛事。
【延伸閱讀】更多學科揭秘 | 中文大學：中文教育 | CUHK Chinese Language Education
【延伸閱讀】更多學科揭秘 | 中文大學：建築學| CUHK Architecture
