1.入學須知 （例如收分、面試、想讀呢科有咩要注意⋯）
根據上年既紀錄，Upper Quartile同Median都係4C+2X 33分，所以33分應該算穩陣，當然以前幾屆有31-32分入既Case。
面試方面，我地CU Biomed係Individual Interview，主要都係lecturer或者professor問一d普通既問題，例如你有咩志向（點解想讀Biomed）或者問關於醫學/生物科技既常識/時事。
想讀依科既話，一定要讀Bio或者Chem最少其中一科，另外讀第三科選修科會加分，（而任何一科如果有5或以上都會按依家大學最新既加分機制加分）。
【贏在起跑線：按此查閱Flowsophic Chemistry 筆記商店】
【贏在起跑線：按此查閱Flowsophic Biology 筆記商店】
2.科目與學業 （例如要讀啲咩，有啲咩course，有冇intern/exchange既機會⋯)
Major既必修/選修課程方面可以分兩個部分，year 1-2主要係同醫學/Bio有關既基礎課程，包括:
- Biochemistry 生物化學
- Physiology 生理學
- Molecular Biology 分子生物學
- Anatomy 解剖學
- Pharmacology藥理學
- Pathophysiology 病理生理學
*據聞來年syllabus會有改革，同學要留意CU Biomed公佈。
依d基礎課程有難有易，但如果勤力讀既話一般同學都可以合格有餘，甚至好多人都好高GPA。如果中學無讀Bio，一開始會有D辛苦但係Faculty既必修課程Health Science健康科學會幫你補底，所以唔需要擔心。
第二部分係Concentration Area專修範圍。中大Biomed同HKU/City Biomed相比最大特點係有三個專修範圍比同學選擇，包括生物醫學研究、管理與企業策略，同埋健康服務與諮詢。不過同學需要留意，依D專修範圍唔屬於專業資格，只係決定你final year既時候需要做研究project定係實習。
另Area A研究係最大路，讀唔同範疇好難既course（例如Neuroscience神經科學，Cancer癌症），而且要做research project，適合日後想進修讀postgrad/想做研究既同學。
至於Area B商業果邊，會有機會同其他Law或者Business既同學一齊讀某d course，所以如果想做科學園果d生物科技公司/藥廠管理人員就可以考慮下。
Area C健康服務與諮詢主要係學關於genetics遺傳學既分子生物技術、Forensic Science法證科學，Clinical Anatomical Pathology解剖病理學同埋實驗室儀器既運用（例如Electron Microscope電子顯微鏡、Mass Spectrometer質譜儀），適合唔鍾意做研究但係對實驗室工作有興趣既同學。
至於實習機會方面，我地school每年會提供暑假研究實習機會（簡稱SUBRA），比同學係我地自己既school入面跟其中一個professor做兩三個月既研究project，然後做一個poster presentation。基本上讀完第一年既同學就可以參加依個project，而且幾乎人人有份，甚至可以連續兩年參加（如果你仲有興趣的話），可以話係砌CV首選。
依個project最大好處就係比同學體驗做學術研究既生活，比同學了解自己對研究係咪真係有興趣，如果無興趣亦可以當係一個實習機會。另外，school間中亦會同其他機構合作比一d暑假實習機會，例如去製藥公司或者遺傳服務公司（不過極多數都係內地）。最後，選擇Area B/C既同學一定要係做實習先可以畢業，因此school會透過合作夥伴提供少量實習機會（例如做生物科技專利既律師行、科學園公司等）。
Exchange交流機會方面，暫時我地學系無提供特別同生物醫學有關既交流機會，但同學可以透過大學、書院或者Faculty黎申請其他既exchange programmme。
3. 未來出路
由於今年先有第一屆師兄姐畢業，所以暫時未知道確實既出路有咩。不過，根據school既宣傳資料，大致上出路可以分為進修同就業。
進修方面，鍾意研究既同學可以讀Research Postgraduate (Mphil/PhD)研究生碩士/博士課程，可以係中大繼續讀或者其他大學都得，據我所知已經有師兄姐會繼續係中大Biomed讀博士課程。除左研究方面，School都力推醫學遺傳學Medical Genetics碩士同埋遺傳諮詢Genetic Counseling專業文憑，讀完之後可以有機會做Genetic Counsellor，係依家基因同生物科技發展得咁快既年代黎講都係一門新興行業。
另外，未來中大Biomed會開一個關於先進療法（Advanced therapy）既專業課程比Biomed既同學進修，比同學日後係幹細胞/基因治療既醫療產業方面發展。中大biomed亦有同澳洲合作，推出4+4生物醫學+醫學博士既課程，比有興趣讀醫既同學多一個選擇，不過就未必可以係香港執業（外國大學返黎都要考執業試）。近四年內，據我所知曾經有一位同學係中大讀完一年生物醫學之後就申請Internal Transfer，成功轉讀Medic，但亦有唔少同學申請失敗。我地同HKU Biomed唔同，無直接銜接既安排，所以同學需要留意。
就業方面，School寫左好多唔同既範疇，例如政府部門、醫院、私人診斷/檢測實驗室、遺傳諮詢、生物科技公司、生物製藥公司/藥廠同埋專門處理生物科技專利既律師樓等。不過，睇番實習既機會黎講，最大可能都係去返同School有合作既科學園生物科技公司/遺傳化驗所/遺傳諮詢公司工作，主要做關於實驗室化驗/Quality Control品質監控或者Marketing/Sales既工作。
【延伸閱讀】更多學科揭秘 | 中文大學：全球研究 | CUHK Global Studies
【延伸閱讀】更多學科揭秘 | 理工大學：測量 | PolyU Surverying
