貴為Poly 3寶之一，物理治療科Physiotherapy 一直都受一眾有志參與醫療護理行業嘅同學歡迎。隨住越來越多自資院校都開放物理治療課程，究竟點解大家都依然追求入到PolyU Physiotherapy？跟著落黎就等而家讀緊PolyU Physiotherapy嘅同學為大家一解迷思啦！
1. 入學需知
物理治療近年收生分數都幾穩定，近年分數調整之後median 大概best 6 39.9分，當年我入學嘅時候識嘅人最少都有best 6 33分（分數調整之前）。計Weighed score嘅話，median 大概290-300，而minimum係 ~280 (根據自己同friend推測，Chem應該係 x5)。
Interview方面，PolyU 3寶一向都唔太着重面試，而只係睇你DSE成績。只要面試時表現正常，基本上夠分都一定會收。
有唔少人聽見物理治療個名就以為同Physics 息息相關，但其實入到黎讀嘅嘢大部份都係同Biology有關。所以如果對Bio興趣唔大嘅同學，揀之前一定要三思，唔好貪呢科收分唔低 / 係讀唔到醫科嘅人必揀 就直接填落A1，如果唔係讀落去就好大機會讀得辛苦 / 讀唔掂。
2.課程大綱
正如頭先所講，物理治療主動嘅嘢係關Biology，Physics只係佔極少數。Year 1 Sem1主要係讀language requirement / 教你點樣做個successful leader，只有兩個course係同Science 有關 (Physiology 同埋 Anatomy)。個人認為，Sem1 讀嘅野同物理治療關係唔大。
Physiology (生理學) 讀嘅嘢同DSE bio 幾相似，不過會比DSE bio讀得更加深入。呢科係全部醫療科嘅學生都要讀，所以一般來講會容易啲攞靚 grade。但值得一提係呢科workload極大，有好多野要背，對有bio底嘅同學都讀得唔輕鬆。如果你中學冇讀bio嘅話，讀起上嚟一定係非常辛苦！
Anatomy (解剖學) 相對上會比較少跟DSE bio重疊。呢科主要係讀人體結構，例如唔同 artery / vein / organ / system 嘅位置同function等等。同physiology 好唔同，呢科嘅assessment method有~50%係group case study，簡單來講即係隊友決定你個 grade 😉 所以一般都比較少 PT學生會溫呢科。
Sem2 有一半course係language course / 大學通識 (CAR)，另一半係得RS department (PT / OT)學生讀。
Sem2 有3個course係自己department，分別係Functional Anatomy (PT+OT)，Research Method and Statistics (PT+OT) 同 Movement Science (得PT人讀)。
Functional Anatomy 主要係讀人體解剖學，讀全身muscles 嘅位置同function，workload係極重，但呢個course亦都係非常重要， 因為佢為Year2 – Year4 嘅course打下根基。
Research Method and Statistics 主要係教做study(學術研究報告) 嘅時候應該點樣處理數據。呢科比較輕鬆，雖然要處理數字但同DSE core math / M1 / M2 完全冇關係，數底好嘅同學都唔會有優勢。
Movement Science 主要係講身體唔同關節 (joint) 嘅運作。呢科係比較難明，亦都幾多野背，但讀嘅嘢相對唔係紙上談兵，真係講緊唔同joint 運作嘅時候點樣協調。個人認為呢科係Year 1 咁多個course裏面最有趣。
Year 2 – Year 4 大部份讀嘅course 都係自己department，亦都係同物理治療師要識嘅嘢越嚟越息息相關。對於真係對物理治療有興趣嘅同學，Year 2 開始應該會讀得開心啲！
呢科接近冇任何intern / exchange 機會，畢竟醫療科仲要淨係讀四年，時間上十分倉猝、容許唔到。升 Year2 暑假/ 升 Year3 暑假/ Year 3 / Year4 都要去醫院實習，畢業前要儲夠1000 hrs。RS department 會一早幫同學安排好實習時間日期地點，同學唔使自己send CV搵人請啦。
Year 1 Sem2 讀嘅Functional Anatomy係暫時令我印象最深刻。
首先，呢個course係真正開始讀啲同物理治療有關嘅嘢，每1個muscle嘅exact 位置、功能，唔同tendon / ligament / artery & vein點樣接駁等等，全部都會好仔細讀晒。可以真正讀啲同本科有關嘅嘢，了解到人體唔同骨、關節嘅詳細資料。讀完之後有好大滿足感。
第二，呢個course安排咗lab session。同學要去實驗室上堂，可以對住屍體學muscles，零距離將lecture學到嘅嘢apply落現實上。最後，好老實講，呢個course真心勁chur。連續一兩個星期日夜咁背書，淨係為咗個final exam，考完出嚟先發覺你身邊啲同學仲勤力過自己，最後都係B range… 呢個course可能係我咁耐以來最俾心機讀嘅一個course，所以印象亦都最深刻！
3. 學科文化
PolyU學生嘅大學生活可以過得好精彩，亦都可以頹到傻，只係睇吓你點樣自己選擇。
一般來講，物理治療學生都係勤力仔女，唔會點住hall / join hall嘅活動，而只係圍內PT人自己玩。
大部份物理治療學生都會join OCamp，然後同組入面嘅同學變熟，最後成為4年firm firm嘅朋友。由於物理治療OCamp每個細組都有~ 10個組仔 + 10個組女，所以要搵到個同自己啱嘴型嘅人做朋友其實好容易！
開咗學之後上堂真心好難識人。大部分PT人開學之後都會跟返細組玩，組內枕住有re-U，可以當係讀書以外嘅調劑。
唔係賣花讚花香，但3寶嚟講，PT人係最外向最肯識新朋友。雖然上面講話開學後難識人，但其實PT人大部份都好nice，唔會搞小圈子、唔會主動杯葛排擠其他人，人同人之間嘅關係亦都比較簡單。個人認為淨係跟ocamp細組玩嘅大學娛樂已經算豐富，因為除咗組內不斷會有re-U之餘，同學都要花好多時間溫書，其實係冇咁多時間玩㗎。
4.宿舍生活
講到住hall，我自己都住過舊hall。喺hall內要識人絕對唔易，好多時都係要靠friend 搭 friend 先可以識到新朋友。仲有，hall 入面嘅人普遍比較攻利，如果你自己本身唔太yo唔太外向，住hall絕對會住到你想quit。雖然hall裏面會有唔少活動，例如inter hall 比賽，hall mate一齊打麻雀/ 飲酒等等，但呢啲活動好多時都只係一堆本身就識得嘅人圍威喂，多過真係比新嘅宿生識新朋友。相比起舊hall，較新淨嘅新hall 會係一個似”宿舍”嘅真正宿舍。
5.未來出路
未來出路方面，絕大部份同學畢業之後都會打工，唔會直接讀master。大部分人都會留喺醫管局(HA)做，而少部份會去非政府機構 (NGO) 工作。未來4-5年嘅畢業生相信都唔係好難搵HA工，但10年之後比較難講，不過都唔太關未來一兩年升大學嘅各位dser。
技術移民方面，物理治療師相對彈性較高，外國好多國家都對理工大學物理治療畢業生認可 (僅限PolyU畢業生) ，去到外國唔使再考執業試。所以如果你係諗住將來移民外國，揀物理治療讀會係一個幾好嘅選擇！
6.常見問題
1. 冇讀Bio仲讀唔讀物理治療?
Year 1 Sem 1的而且確會讀得好辛苦，好大機會係你日鋤夜鋤最後都爛grade。但要記住你身邊嘅同學全部都有三年根底，所以佢哋考得好其實都正常啦。另外，從Year 1 Sem 2 起其實DSE bio對學嘅嘢係完全冇幫助，所以大家係喺同一條起跑線開始，絕對唔使擔心自己中學冇讀Bio就永遠都會遙遙落後! 只要你有心捱，唔介意Sem 1 GPA低過其他人，就算中學冇讀Bio都絕對可以揀物理治療。
P.S. 1屆大概有5-10個人中學冇讀Bio。冇讀Bio weighing好難夠分入 :(((
【延伸閱讀】Flowsophic 各類Biology生物科筆記參考
2. 係咪唔少物理治療嘅學生都唔係應屆DSE考生?
自己識返嚟都有唔少身邊同學唔係應屆DSE考生，有啲係其他U trans過嚟，亦都有啲係quit U re-Jupas。除此之外，有唔少都係通過Non-Jupas入嚟，例如考IB 或者中學喺外國讀書。
3. PT裡面係咪有唔少Sporty嘅同學?
每年物理治療都會收幾個透過運動員計劃入嚟嘅同學，包括桌球、體操、劍擊、游水等等。我自己身邊都有唔少人唔係運動員計劃入嚟但都好鍾意做運動，行山踢波打籃球甚至網球都有，所以唔好有個錯覺覺得讀物理治療嘅人就係死讀書啊！
4. 讀物理治療嘅人係咪全部都係揀唔到醫科先讀?
真係有呢啲人，但唔係全部。的而且確有唔少人係將MBBS放A1，但都有好多係一心一意讀PT，就算夠分讀醫都冇走去讀。自己身邊都識得有人係騎牛搵馬，報HKU CUHK 醫科，希望可以trans科 (接近冇成功例子)，但大部份想入醫而最後讀PT嘅人都會安於讀PT而爆GPA。呢個亦都係點解PT係全PolyU學習氣氛最濃厚嘅科目嘅主要原因 (大家都係好俾心機讀書的)。
RS Department每年都有個High-flyer programme，僅限於夠分讀醫但冇讀嘅人join。雖然Programme內容唔算好精彩，但起碼可以同滕校長同枱共膳;)
5. 點睇越來越多學院開辦物理治療?
有心讀嘅人入唔到PT，冇心而質素唔高嘅人撞正天時地利就有得讀。
短期來講 (5-10年)，我相信對理工大學畢業生係接近冇影響，因為PolyU 畢業始終認受性高好多。但長遠來講仲有好多未知之數，例如醫生會否因此拒絕放權免轉介等等，呢啲現階段都好難預測。
個人認為千祈唔好因為明愛新學年開始開辦物理治療而唔入PolyU PT，因為一來入物理治療係自己本身嘅理想目標，二來佢哋嘅畢業生認受性低，三來市場上需求仍然大。所以各位有心嘅同學，千祈唔好因為呢啲消息就放棄入讀啦!
【Poly三寶之放射學】PolyU Radiography 收分、出路 – JS3612 | 理大：放射學(榮譽)理學士學位
