1）入學需知
| 2021 平均收生分數 | 16.24 |
- 預計收生：70人
- 屬於SSSDP，合資格學生可獲每年 HK$44,100 學費資助，扣除資助金額後，首年學費如下。有關詳情，請瀏覽：這裏…
- 分數計算方法：Best 5 (4C+1X)，最佳五科包括核心科目、甲類選修科目及數學延伸部分（單元一或單元二）
- 在相同入學分數的情況下，課程將參考其他資料如聯招次序選擇、面試表現、比賽/活動的經驗及成就、校長推薦計劃等，以決定取錄名單
2) 面試方式、問題
- 沒有筆試，無second in
- 面試將於每年5月至7月期間進行。申請人將收到電子郵件通知有關面試安排的細節
- 師姐分享：
我果陣係個人面試，大約10分鐘，面試以廣東話進行，通常會問關於呢一科嘅資料（例如DS同BI咩意思、點解揀依科、讀完依科之後有咩打算），同埋點解想揀呢間u，其實d 答案都寫曬響恒大個網頁度，去面試之前記得要溫書，照住答就ok，佢見你答案正正常常，就會收你。
3) 與科目學業有關
師姐分享：
呢科主要係讀數學，再加配電腦同商科，如果中學有讀M1/M2 或者對數理比較敏感嘅人會容易啲讀。
電腦係讀一啲同分析軟件有關嘅，例如SAS, python 等等，有少少ict底嘅人會比較容易上手；商科就包括Econ, Marketing, Finance, Management 同 Accounting 都係學基本入門，唔會太深入，冇商科底都會pick up 到。想要靚grade，就要睇你花幾多時間、心機去學習，有d老師會響堂上講曬邊 part最重要，所以要留心上堂，就算幾想走堂都唔好走最後嗰堂，因為老師會講解到底邊啲概念係最重要同埋一定會考，佢會提你邊一part一定要溫，唔上就走寶啦~
4) 大學生活與文化
大學有各方面嘅課外活動，可以根據自己興趣或者需要去選擇，每個學系都會有自己嘅活動，例如比賽和 Mentorship Scheme 等，如果想知多啲就記得mon住學校郵箱。
其實大家一入學，學校就會分配一個 Personal Tutor 畀你，你有咩問題都可以問佢，無論係關於學術、職涯規劃、學校方面都可以，例如好多小編嘅同學響搵工、升學果陣搵 Personal Tutor 寫推薦信。
小編心聲：面對問題，自己搵佢好過佢主動黎搵你，尤其學習上遇到困難。
如果識朋友嚟講， 有好多途徑，除左最常見嘅ocamp外， 上堂都可能會識到friend， 因為恆大推廣小班教學，一班通常只有三十幾人同中學一樣，所以師生關係都唔會太過疏離，當然參加多啲校內校外活動都會識到多啲朋友。
仲有好多學校資源可以幫助大家學習，例如圖書館有獨立個人自修室（當然要一早預約定，成日 full booking 架~），又會有英語中心裏面有電影放映室，同埋外籍英語老師佢哋都可以幫你解決你英文上嘅問題同埋同你一齊準備考IELTS，做功課方面，tutor都會好願意幫助你，可以Email、Whatapps或者打電話比佢都得。
5) 未來出路
學系會提供 Career support，例如上面講過嘅 Personal Tutor，記得有咩就直接同佢講，唔好轉彎抹角，咁樣佢先可以畀到你最適合嘅意見，如果有相關嘅活動都會通知你一聲。
專業資格方面，只要你響五個指定嘅必修單元取得合格，平均獲得B- 或以上嘅成績，就可以入紙申請由香港統計學會和SAS Institute （全球最大型的商業分析軟件製造商之一）頒發嘅專業證書。
行業前景方面，依科嘅就業選擇有好多：數據科學家、數據分析師、商業智能專業人員、統計師、金融分析師、市場研究員等，另外學校會提供好多實習機會，有人會去恒生銀行、Pacific BMW、安永會計師事務所（EY）等。
畢業後亦可以選擇進修，例如修讀港大嘅統計學碩士、科大嘅金融數學理學碩士同中大嘅數據科學及商業統計理學碩士等。
6) 給Freshman的建議
師姐想對歷年dser說的話：
大學唔會有人迫你去讀書或者去鞭策你，全部野都要自動自覺，要識得自己去編排好課程、時間、活動等等。仲要把握學校俾你嘅資源，例如實習，活動等等好多唔同既機會，可以去試下，唔好怯，最緊要肯去參加！
小編的話：各位DSER，小編都係DSE過來人，深刻明白三年寒窗苦讀嘅苦楚同孤寂，但我地 Flowsophic 想同你地講，你地絕不孤單，我地會同你地一齊去行，如果有咩問題，歡迎你地響IG、FB留言或dm我地，講底你地心中煩惱、一吐苦水，然後重新出發，再踏上學習之路，獲得響大學選擇心儀科目的機會，開展人生新一頁。
如果你覺得小編講嘅野好有用，不妨用以下嘅筆記備戰，全部都係出自狀元、名師之手嘅5**筆記黎架~
放心，下面絕對係廣告 ʕ•ᴥ•ʔ
【延伸閱讀】【想做N展仔？】揭秘JS6963 – 香港大學：工學學士 | HKU Engineering
【延伸閱讀】【恒管變恒大】揭秘JSSH01 – 香港恒生大學：供應鏈管理工商管理 | HSUHK Supply Chain Management
