1.入學須知
首先要講一講學位數量方面 :
- 會計及財務 – Accounting and Finance (A&F)（6781）
- 經濟金融學 – Economics and Finance (E&F)（6767）
- 資產管理及私人銀行 – Finance in Asset Management and Private Banking (AMPB)（6860）
三科夾埋會收280人左右，其中A&F收生最多，佔一半人數左右。
而收生分數方面，A&F 2020自從收生會由4C+2X轉變成為必計英數嘅Best 6 (5/5*/5**都會有bonus)，2021年UQ，Median、LQ收分分別係39，36，35分。其中一點要注意的就是，A&F計分上M1/M2只可以取代數學，唔可以當一個X，而E&F則可以當M1/M2係一個X去計分，數學好啲嘅同學計分時要留意吓。
面試形式可能隨時會變，我當年（2012）是以小組形式進行的，會按表現加分，但是面試非必要的，同學可以自行決定出席與否。
2. 與科目學業有關
與其講呢一科係點讀，我建議大家先了解一般大學係點樣決定你畢業嘅 major。其實讀大學就好似玩 bingo咁，只要你讀夠嗰個主修喺學校所指定嘅課程，你就可以喺畢業證書上面去話自己喺咩科畢業，不受限於你入嗰間大學時嘅第一個主修，除非你想連第一個主修都轉埋（即係俗稱trans科，要特別申請）。
點解大家要盡快搞清楚呢樣嘢？因為通常第一年，學校已經會幫你預先reg咗一啲課程，不過你自己心目中嘅major可能未必需要讀嗰個課程，最後可能會讀得又辛苦、grade又唔靚，及早計劃定，成個大學生活都會過得輕鬆啲！
舉個例子，本身讀A&F學校會預先幫你 Reg咗STAT1602 – Business Statistics先，作為Accounting major嘅Statistics Requirement，不過原來如果你想major埋Finance（本身A&F係minor Finance），Statistics Requirement入面係無STAT1602，如果讀完STAT1602先想major埋Finance，又要再讀另一個去填補翻個要求，咁就好唔抵！
第一、二年嘅課程主要都係intro為主，了解唔同範疇嘅商科係讀啲咩，當然要同時應付Common Core（CC）以及CAES（英文課程），個人認為到CC同埋CAES仲辛苦過本身major要讀嘅課程；
而第三、四年先真係主力讀major啲內容，會比較讀得深入一啲，不過慶幸HKU Business考試通常唔太深，壓力都唔算太大。
3. 最深刻大學課程/活動
最深刻嘅課程都係非 STAT1602 – Business Statistics莫屬。不過唔係因為呢個課程帶到啲咩價值出嚟，亦並非十分艱深，而係 Professor Wong實在太有趣，能夠將英文咁有趣地表達出嚟，可以講每一句都令在座所有學生嘻哈大笑，難怪佢可以一直深受學生愛戴。而我亦喺呢個課程攞咗大學生涯唯一一個A+，所以對呢個課程印象當然係最深刻。
4. 大學生活
大學五件事，讀書、上莊、住hall、兼職、拍拖，入得HKU，我覺得住hall都係幾獨特嘅一樣體驗。儘管HKU嘅hall文化為人詬病，但係我相信住hall依然會帶俾大家一啲價值，例如點樣與人相處、點樣做一個好嘅leader同埋teammate，呢啲soft skills唔係睇書就可以學得到、學得識、學得好。
我住嗰個hall雖然唔係好出名，一年可能會有一次媒體報導吓，不過顏色就非常出眾，通常大家都直接用隻顏色叫間hall，大家自己估吓啦！住咗3年，都有擔當過唔同角色，每年都有唔同角色，都有從中學到唔少事情，不過每個人嘅感受都會唔同，真係要等大家自己去感受吓。
5. 未來出路
讀得A&F，出路都不乎 Big4（四大會計師樓）同埋銀行（我做全職補習導師實屬異類）。受惠於HKU以前嘅名氣，搵工都相對容易，而各大公司都會嚟HKU舉辦Career Talk，只要各位自己把握機會，相信要搵到心怡工作應該問題不大。學校給予嘅幫助亦非常全面，香港大學學生發展及資源中心（CEDARS）可以提供就業指導，例如協助學生寫CV、模擬面試，甚至介紹學生去翻 intern都有。最緊要都係同學自己要採取主動，機會永遠係留俾有準備嘅人。
